"Dites moy ou, n'en quel pays
Est Flora la belle Romaine,
Archipiades, ne Thais
Qui fut sa cousine germaine,
Echo parlant quand bruyt on maine
Dessus riviere ou sus estan
Qui beaulte ot trop plus qu'humaine.
Mais ou sont les neiges d'antan?
Qui beaulte ot trop plus qu'humaine.
Mais ou sont les neiges d'antan?
Ou est tres sage Hellois,
Pour qui chastre fut et puis moyne
Pierre Esbaillart a Saint Denis?
Pour son amour ot ceste essoyne.
Semblablement, ou est royne
Qui commanda que buridan
Fut gete en ung sac en Saine?
Mais ou sont les neiges d'antan?
Fut gete en ung sac en Saine?
Mais ou sont les neiges d'antan?
La royne blanche comme lis
Qui chantoit a voix de seraine,
Berte au grand pie, Bietris, Alis
Haremburgis qui tient le Maine,
Et Jehanne la bonne Lorraine
Qu'Englois brulerent a Rouen;
Ou sont ils, ou Vierge souveraine?
Mais ou sont les neiges d'antan?
Ou sont ils ou Vierge souveraine?
Mais ou sont les neiges d'antan?
Prince, n'enquerez de sepmaine
Ou elles sont, ne de cest an,
Qu'a ce refrain ne vous remaine:
Mais ou sont les neiges d'antan?
Qu'a ce refrain en vous remaine;
Mais ou sont les neiges d'antan?
"