Ahl Männer, die Hand en Hand, als Denkmal uss Schmalz, ahndächtig vüür Kameras posiere, ennwendig ihßkalt. Ihr Trauer, die duudjeboore, als Kür em Protokoll, vüür'm Festbankett absolviere. Ich weiß, wat dat soll. Paradeschritt, Marschmusik, Schwaaz-Ruut-Jold em Wind un platteste Sprüch parat für Opfer, die blind. Ihr Stemme als Krüzzje brav – vüürdemoskopiert - en Urnen bejraave: Friedhöff – demokratisch kaschiert. Ahl Männer, unerbittlich nette ahl Männer – pathetisch, fett un satt. Ahl Männer, uss 'em Ei jepellte ahl Männer – aalglatt. Schauspieler, die 'm Schmierentheater durchfeele – mangels Talente – konfus met Erdteile jongliere, en Rolle vun Staatspräsidente. Wie Aape, die met jeladne Pistole neujierisch hantiere, dürfen Viersterne-Clowns ihr Rakete wie Spillzeuch em All stationiere. Dat he's kei Land mieh, wo beim Barbier Portraits ahn der Wand, vun Despote, die en Schullklasse Logenplätze hann, doch immer noch eins, wo ahnbiedernste Böck Järtner sinn, och wenn se noch so off blööke, dat dat lang nimmieh stemp.